वासिङ्टन । अमेरिकी राष्ट्रपति डोनाल्ड ट्रम्प र चिनियाँ राष्ट्रपति सी चिनफिङबीच बिहीबार ह्वाइट हाउसमा औपचारिक वार्ता सुरु भएको छ। एक दशकपछि अमेरिकाको राजकीय भ्रमणमा आएका सीलाई ट्रम्पले ह्वाइट हाउसमा स्वागत गर्दै दुई देशबीचको छलफलले आगामी दशकमा शान्ति र समृद्धिलाई प्रभाव पार्न सक्ने बताएका छन्।
ट्रम्पले सीलाई अमेरिकाको दोस्रो राजकीय भ्रमण गर्ने पहिलो चिनियाँ नेता भएको उल्लेख गर्दै सुरक्षा, प्रविधि र कृत्रिम बौद्धिकता (एआई) लगायतका विषयमा महत्वपूर्ण छलफल हुने बताए। ट्रम्पले पछिल्लो समय एआईलाई ‘सुपर इन्टेलिजेन्स’ भन्ने गरेका छन्।
ट्रम्पले अमेरिका–चीन व्यापार सम्बन्धलाई पहिलेभन्दा सन्तुलित बनाउने दिशामा काम भइरहेको बताए। दुई देशबीच व्यापार, प्रविधि, दुर्लभ खनिज तथा एआईलगायतका विषय लामो समयदेखि प्रमुख छलफलका विषय रहँदै आएका छन्।
सी चिनफिङले ट्रम्पको निमन्त्रणामा अमेरिका आएको उल्लेख गर्दै मित्रता कायम राख्न, सहकार्य विस्तार गर्न तथा दुवै देशका जनताको हित र समृद्धि प्रवर्द्धन गर्न भ्रमण गरेको बताए। उनले वर्तमान विश्वमा ठूला परिवर्तन भइरहेकाले चीन र अमेरिकाले मानव विकास तथा प्रगतिका लागि ऐतिहासिक जिम्मेवारी वहन गर्नुपर्ने धारणा राखे।
सीले चीन र अमेरिका दोस्रो विश्वयुद्धका क्रममा फासीवादविरुद्ध मिलेर लडेको इतिहास स्मरण गर्दै दुई देशबीच संवाद र सहकार्यलाई निरन्तरता दिनुपर्ने बताए। उनले दुवै देशबीच द्वन्द्वभन्दा सहकार्यबाट लाभ हुने र सैन्य पक्षबीच संकट व्यवस्थापन तथा संवादका संयन्त्र थप मजबुत बनाउनुपर्नेमा जोड दिए।
एआईबारे सीले यसको विकास मानव नियन्त्रणभित्र र जनताको हितमा हुने गरी अघि बढाउनुपर्ने बताएका छन्। चीन र अमेरिका एआई क्षेत्रमा अग्रणी देश भएकाले यस क्षेत्रमा जिम्मेवारीपूर्वक काम गर्नुपर्ने उनको भनाइ थियो।
सीले आगामी पाँच वर्षमा १ लाख अमेरिकी युवालाई चीन भ्रमण तथा आदानप्रदानका लागि निमन्त्रणा पनि दिएका छन्। साथै, उनले अमेरिकाको एटलान्टा चिडियाखानामा दुई वटा पाण्डा पठाउने घोषणा गरे।
दुई नेताबीचको वार्तामा व्यापार, सुरक्षा, प्रविधि, एआई र दुई देशबीचको सम्बन्ध व्यवस्थापन मुख्य विषयका रूपमा रहने अपेक्षा गरिएको छ।
