२० असोज, काठमाडौं — पूर्वाधार विकासमन्त्री सुनिल लम्सालले तातोपानी नाका सञ्चालनमा ल्याउन चीनसँग निरन्तर संवाद भइरहेको बताएका छन्।
सिंहदरबारमा आयोजित हिमालमा जलवायु परिवर्तनको प्रभाव, जलवायु न्याय तथा भोटेकोशी–त्रिशूली विपद्सम्बन्धी संसदीय विशेष समितिको बैठकमा मन्त्री लम्सालले तातोपानी नाका सञ्चालनका लागि नेपाली पक्ष तयार रहेको जानकारी दिएका हुन्।
उनका अनुसार तातोपानी नाका सञ्चालनका लागि नेपाली पक्षले आवश्यक सडक तथा पूर्वाधारको काम तत्काल अघि बढाइसकेको छ। नाका सञ्चालन गर्न नेपालतर्फ कुनै कठिनाइ नरहेको र चीनसँग दैनिकजसो संवाद भइरहेको उनले बताए।
मन्त्री लम्सालले विपद्का कारण नाका सञ्चालनमा समस्या आए पनि सरकारले सडक तथा अन्य पूर्वाधार पुनःस्थापनाको कामलाई प्राथमिकताका साथ अघि बढाइरहेको बताए।
चिनियाँ पक्षबाट भने नाका सञ्चालनका लागि अझै अनुमति प्राप्त नभएको उनले जानकारी दिए। विपद्को अवस्थामा नाका सञ्चालन गर्न चीनले अझै ‘ग्रिन सिग्नल’ नदिएको भन्दै उनले संवाद र प्रयास जारी रहेको बताए।
“हामी प्रयास गरिरहेका छौं । मलाई लाग्छ, चाँडै नै हामी नाका खोल्न सफल हुनेछौं,” मन्त्री लम्सालले भने।
त्यस्तै, चीनसँगको प्रमुख व्यापारिक नाकाका रूपमा रहेको रसुवागढी नाका पुनः सञ्चालनमा ल्याउन पनि सरकारले योजना बनाइरहेको मन्त्री लम्सालले बताए।
