५ असोज, काठमाडौं । काठमाडौंको त्रिपुरेश्वरस्थित चोकको बस स्टपअगाडि बसमा आगलागी हुँदा चालक घाइते भएका छन्।
काठमाडौं उपत्यका ट्राफिक प्रहरी कार्यालयका एसपी नरेशराज सुवेदीले बसमा आगलागी भएको पुष्टि गर्दै चालक घाइते भएको जानकारी दिएका छन्।
उनका अनुसार घाइते चालकलाई उद्धार गरी उपचारका लागि अस्पताल पठाइएको छ। आगलागीको कारणबारे प्रहरीले अनुसन्धान गरिरहेको छ।
आगलागी भएको बसको नम्बर बा ५ ख ४२७४ रहेको प्रहरीले जनाएको छ। बसका चालक काभ्रे घर भएका २५ वर्षीय दावा लामा रहेको बताइएको छ।
प्रहरीका अनुसार चालक बसभित्रै रहेका बेला आगलागी भएको थियो। त्यसैले घटनालाई शंकास्पद रूपमा समेत हेरिएको छ।
आगलागीको वास्तविक कारणबारे अनुसन्धानपछि थप विवरण खुल्ने प्रहरीले जनाएको छ।
