काठमाडौं । बूढीगण्डकी नदीमा आएको आकस्मिक बाढी माथिल्लो नदी क्षेत्रमा पहिरो खसेर नदी थुनिएपछि आएको हुन सक्ने अनुमान बाढी पूर्वानुमान महाशाखाले गरेको छ।
महाशाखाले जारी गरेको विज्ञप्तिमा बाढीको उद्गमस्थल तथा आसपासका क्षेत्रमा भीषण बाढी ल्याउने गरी वर्षा नभएको उल्लेख गरिएको छ।
जल तथा ऊर्जा आयोगको सचिवालयअन्तर्गत जलविज्ञान तथा जलस्रोत अनुसन्धान केन्द्रका प्रवक्ता राजन भट्टराईका अनुसार पछिल्लो २४ घण्टामा उक्त क्षेत्रमा छिटपुट मात्र वर्षा भएको थियो।
‘प्रारम्भिक सूचना तथा भू–उपग्रह तस्बिरका आधारमा माथिल्लो नदी क्षेत्रमा पहिरो खसेर नदी थुनिएपछि बाढी आएको हुन सक्ने अनुमान गरिएको छ,’ भट्टराईले भने।
वर्षा न्यून भए पनि नदीमा अचानक बाढी आउनुले माथिल्लो क्षेत्रमा पहिरोका कारण पानी थुनिएर एक्कासि बगेको हुन सक्ने आशंका गरिएको हो। यद्यपि, बाढी आउनुको वास्तविक कारण पुष्टि हुन थप अध्ययन तथा स्थलगत विवरण आवश्यक पर्नेछ।
