पोखरा – बाढी तथा अन्य विपद्बाट प्रभावित विभिन्न जिल्लाबाट पोखरा ल्याइएका ७६ वटा शव मंगलबार व्यवस्थापन गरिएको छ।
कास्की प्रहरीले दिएको जानकारीअनुसार धादिङ, तनहुँ, गोरखा र पूर्वी नवलपरासीबाट पोखरा ल्याइएका कुल १०२ शवमध्ये ७६ वटा शव व्यवस्थापन गरिएको हो।
ती शव पोखरा–१६ स्थित सेती नहर छेउको वन क्षेत्रमा तोकिएको प्रक्रियाअनुसार तथा अन्तर्राष्ट्रिय मापदण्डलाई ध्यानमा राखेर जमिनमुनि व्यवस्थापन गरिएको प्रहरीले जनाएको छ।
विभिन्न जिल्लाबाट ल्याइएका शवमध्ये १९ वटा पहिचान भइसकेका छन्। पहिचान भएका शव सम्बन्धित आफन्तलाई जिम्मा लगाइएको कास्की प्रहरीले जनाएको छ।
त्यस्तै, ७ वटा शवको पोस्टमार्टम तथा डीएनए नमुना संकलनको प्रक्रिया पूरा हुन बाँकी रहेकाले ती शव अस्पतालमै राखिएका छन्।
पहिचान प्रक्रिया नसकिँदा ७६ शव मात्रै व्यवस्थापन
सुरक्षा निकायले पहिचान भएका शवबाहेक बाँकी ८३ वटा शव व्यवस्थापन गर्ने तयारी गरेको थियो। तर केही शव पहिचानको प्रक्रियामा रहेका तथा केहीको पोस्टमार्टम र डीएनए नमुना संकलनको काम पूरा हुन बाँकी रहेकाले मंगलबार ७६ वटा शव मात्रै व्यवस्थापन गरिएको हो।
प्रहरीका अनुसार शवको पहिचान, पोस्टमार्टम तथा डीएनए संकलनजस्ता संवेदनशील प्रक्रिया पूरा गरेपछि मात्र सम्बन्धित शवको अन्तिम व्यवस्थापन गर्ने प्रक्रिया अपनाइएको छ।
विपद्बाट प्रभावित जिल्लाहरूमा फेला परेका शवहरू पहिचान तथा आवश्यक कानुनी प्रक्रिया पूरा गर्न पोखरा ल्याइएको थियो। आफन्तले पहिचान गर्न नसकेका शवको वैज्ञानिक विधिबाट पहिचान गर्ने प्रक्रिया अघि बढाइएको छ।
शव व्यवस्थापन गर्दा मानवीय संवेदनशीलता, स्वास्थ्य सुरक्षा र आवश्यक मापदण्डलाई ध्यानमा राखिएको प्रहरीले जनाएको छ।
