२५ भदौ, जनकपुरधाम । राजविराजस्थित गजेन्द्रनारायण सिंह सगरमाथा अस्पतालमा प्रसूति गराउन पुगेकी एक विपन्न महिलाले अस्पतालले भर्ना नलिएपछि फुटपाथमै बच्चा जन्माएको घटना सार्वजनिक भएको छ ।
राजविराज नगरपालिका–१४ पर्साहीकी वविता पासवानले आफूलाई प्रसूति व्यथा लागेपछि मंगलबार राति करिब १ः३० बजे श्रीमान् हरेराम पासवानसहित अस्पताल पुगेको बताएकी छन् । उनका अनुसार अस्पतालमा कार्यरत स्वास्थ्यकर्मीले अल्ट्रासाउन्ड तथा रगत र पिसाब परीक्षण गर्नुपर्ने र त्यसका लागि करिब २ हजार ५०० रुपैयाँ लाग्ने बताए ।
आफूसँग पैसा नभएको जानकारी गराउँदै तत्काल भर्ना गरिदिन आग्रह गरे पनि जाँच नगरी प्रसूति गराउन नमिल्ने भन्दै अस्पतालबाट बाहिर पठाइएको वविताको आरोप छ ।
अस्पतालबाट बाहिरिएपछि उनी नजिकैको औषधि पसल अगाडि पुगेकी थिइन् । त्यहाँ केही समय बसेपछि प्रसूति व्यथा बढेको र आफन्तहरूको सहयोगमा उनले फुटपाथमै छोरालाई जन्म दिएको बताइएको छ ।
बच्चा जन्मिएपछि परिवारले सालनालसहित शिशुलाई लिएर पुनः अस्पताल पुगेको भए पनि तत्काल भर्ना नगरिएको वविताको दाबी छ । स्वास्थ्यकर्मीले बाहिर जान भनेपछि आफूहरू घर फर्किएको उनले बताएकी छन् ।
घटनाको भिडियो सामाजिक सञ्जालमा सार्वजनिक भएपछि सरकारी अस्पतालको सेवा प्रणालीमाथि प्रश्न उठेको छ । भिडियोमा महिला सडक पेटीमा प्रसूति पीडाले छट्पटाइरहेको र आफन्तहरूले उनको स्याहार गरिरहेको देखिन्छ ।
तर अस्पतालका फ्रि हेल्थ सर्भिस फोकल पर्सन मनोज देवले भने फरक दाबी गरेका छन् । उनका अनुसार महिला राति अस्पताल आएपछि पीपी जाँच गरिएको र आवश्यक स्वास्थ्य परीक्षणका लागि ल्याबमा पठाइएको थियो । उनीहरू ल्याबबाट बाहिरिएपछि बिहान करिब ५ बजे बच्चा जन्मिसकेपछि मात्रै अस्पतालमा फर्किएको देवको भनाइ छ ।
अस्पतालका मेडिकल सुपरिटेन्डेन्ट डा. रञ्जितकुमार झाले आफूले भिडियो हेरेपछि घटनाबारे जानकारी पाएको बताएका छन् । उनका अनुसार महिला बच्चा जन्माइसकेपछि बिहान करिब ४ बजे अस्पताल आएको जानकारी आफूलाई प्राप्त भएको थियो ।
डा. झाले आफू हाल काठमाडौंमा रहेको भन्दै घटनाको वास्तविकता पत्ता लगाउन छानबिन समिति गठन गर्ने तयारी भइरहेको बताएका छन् ।
सरकारी तथा निजी अस्पतालमा विपन्न तथा गरिब नागरिकका लागि निश्चित प्रतिशत शय्या छुट्याउनुपर्ने कानुनी व्यवस्था छ । यस्तो अवस्थामा सरकारी अस्पतालकै परिसरबाहिर प्रसूति व्यथामा रहेकी महिलाले सडकमा बच्चा जन्माउनुपरेको घटनाले स्वास्थ्य सेवामा पहुँच र विपन्न नागरिकप्रतिको व्यवहारबारे गम्भीर प्रश्न उठाएको छ ।
