२७ भदौ, काठमाडौं । रसुवाको भोटेकोशी नदीमा आएको बाढीका कारण नुवाकोट र रसुवाका विभिन्न स्थानमा रहेका १२ वटा बैंकका १७ शाखा प्रभावित भएका छन्।
राष्ट्रिय योजना आयोग र राष्ट्रिय विपद् जोखिम न्यूनीकरण तथा व्यवस्थापन प्राधिकरणले तयार पारेको द्रुत क्षति तथा आवश्यकता मूल्याङ्कन प्रतिवेदनअनुसार बाढीबाट बैंक तथा वित्तीय क्षेत्रमा करिब ७ अर्ब २४ करोड रुपैयाँ बराबरको क्षति भएको छ।
प्रतिवेदनअनुसार सबैभन्दा बढी क्षति कृषि विकास बैंकको भएको छ। बैंकको एक शाखामा मात्रै करिब ६५ करोड रुपैयाँ बराबरको क्षति पुगेको उल्लेख छ।
त्यस्तै, सिटिजन्स बैंकको एक शाखामा १ करोड ५६ लाख, ग्लोबल आइएमई बैंकको एक शाखामा ११ लाख, हिमालयन बैंकको एक शाखामा ७५ लाख र लक्ष्मी सनराइज बैंकको एक शाखामा १ करोड १२ लाख रुपैयाँ बराबरको क्षति भएको छ।
माछापुच्छ्रे बैंकको एक शाखामा ७५ लाख, नबिल बैंकको एक शाखामा ६३ लाख, एनआईसी एसिया बैंकका तीन शाखामा ८८ लाख र नेपाल इन्भेस्टमेन्ट मेगा बैंकका तीन शाखामा ४० लाख रुपैयाँ बराबरको क्षति भएको प्रतिवेदनमा उल्लेख छ।
त्यसैगरी एनएमबी बैंकको एक शाखामा ४ लाख, प्रभु बैंकका दुई शाखामा ५३ लाख र सानिमा बैंकको एक शाखामा ६३ लाख रुपैयाँ बराबरको क्षति भएको छ।
स्थानीय तहअनुसार क्षति
प्रतिवेदनअनुसार नुवाकोटको विदुर नगरपालिकामा बैंकका चार शाखामा ६७ करोड १३ लाख रुपैयाँ बराबरको क्षति भएको छ।
रसुवाको गोसाइँकुण्ड गाउँपालिकामा ११ शाखामा ४ करोड २३ लाख, कालिका गाउँपालिकामा एक शाखामा २८ लाख र उत्तरगया गाउँपालिकामा एक शाखामा ७५ लाख रुपैयाँ बराबरको क्षति भएको जनाइएको छ।
बैंक तथा वित्तीय सेवासँग सम्बन्धित माथि उल्लिखित क्षतिबाहेक थप १९ करोड ५९ लाख रुपैयाँ बराबरको क्षति भएको प्रतिवेदनले देखाएको छ।
यसअन्तर्गत नुवाकोटको विदुरमा ६ करोड ४० लाख, रसुवाको गोसाइँकुण्डमा ९ करोड ५३ लाख, कालिका गाउँपालिकामा ७९ लाख र उत्तरगया गाउँपालिकामा ३ करोड २३ लाख रुपैयाँ बराबरको क्षति भएको उल्लेख छ।
भोटेकोशी बाढीका कारण बैंकका शाखा कार्यालय, वित्तीय सेवा तथा अन्य संरचनामा क्षति पुगेपछि प्रभावित क्षेत्रमा बैंकिङ सेवा सञ्चालनमा समेत असर परेको छ।
