गोरखा — भारी हिमपात र निरन्तर वर्षाका कारण मनास्लु हिमाल आरोहणका लागि मौसम प्रतिकूल बनेपछि आरोहीहरू बीचबाटै फर्किन थालेका छन्।
मनास्लु क्षेत्रमा दुई सातासम्म मौसम खुल्ने प्रतीक्षा गर्दा पनि अनुकूल अवस्था नआएपछि आरोहीहरू धमाधम घर फर्किन थालेको चुमनुब्री गाउँपालिका–१ सामागाउँका वडाध्यक्ष कर्मा छेवाङ लामाले जानकारी दिए।
उनका अनुसार मनास्लु क्षेत्रमा निरन्तर वर्षा भइरहेकाले आसपासका क्षेत्रमा करिब पाँच फिटसम्म बाक्लो हिमपात भएको छ।
“यस्तो अवस्था यसअघि कहिल्यै देखिएको थिएन। पानी र हिउँ निरन्तर परिरहेको छ,” वडाध्यक्ष लामाले भने।
सरकारले समेत असोज ८ गतेदेखि १२ गतेसम्म सम्भावित खराब मौसमलाई ध्यानमा राख्दै सतर्क रहन आग्रह गरेपछि आरोहीहरू थप जोखिम नलिई फर्किन थालेको उनले बताए।
मनसुनको प्रभाव कायम रहँदा मनास्लु क्षेत्रमा वर्षा र हिमपात बढेपछि आरोहण गतिविधि प्रभावित भएको हो। मौसममा सुधार नआएसम्म आरोहणका लागि अनुकूल अवस्था नहुने स्थानीयको भनाइ छ।
