नेपाली कांग्रेसका सभापति गगन थापाले रसुवा बाढीबाट प्रभावित क्षेत्रमा सहयोग गर्न सक्ने सबैलाई आ–आफ्नो ठाउँबाट सहयोगमा जुट्न आग्रह गरेका छन्।
थापाले बिहीबार सामाजिक सञ्जालमार्फत भिडियो सन्देश जारी गर्दै विपत्तिको समयमा मानवीय सहयोगलाई प्राथमिकता दिन आग्रह गरेका हुन्। उनले सहयोग गर्न नसक्नेहरूले कम्तीमा कटु वचन नबोल्न आग्रह गरे।
उनले भने, ‘सहयोग गर्न सक्ने सहयोगमा जुटौं । सहयोग गर्न सक्दैनौं भने पनि कम्तीमा कटु वचन कसैले नबोलौं।’
बाढी प्रभावित क्षेत्रको स्थलगत निरीक्षणका क्रममा आफूले देखेको अवस्था अत्यन्तै भयावह रहेको थापाले बताएका छन्। केही दिनअघि उनले रसुवा बाढीबाट प्रभावित धादिङ र नुवाकोटका विभिन्न क्षेत्रको स्थलगत निरीक्षण गरेका थिए।
स्थलगत निरीक्षणपछि विपत्तिको वास्तविक अवस्था बाहिरबाट अनुमान गरेभन्दा निकै ठूलो रहेको उनले बताए। बाढीका कारण ठूलो संख्यामा घरबार उजाडिनुका साथै परिवार र मानिसहरू प्रभावित भएको उनको भनाइ छ।
‘यो यति ठूलो प्रलय, यति ठूलो विपत्ति हो कि यति धेरै घरबार उजाड गरेको छ, यति धेरै परिवार, मानिसहरू प्रभावित हुनुभएको छ,’ थापाले भिडियो सन्देशमा भनेका छन्।
उनले विपत्तिको समयमा सबै पक्ष एकजुट भएर काम गर्नुपर्नेमा जोड दिएका छन्। खोज, उद्धार तथा राहतका लागि भइरहेका प्रयासलाई थप प्रभावकारी बनाउन सबैले आ–आफ्नो भूमिका निर्वाह गर्नुपर्ने उनको भनाइ छ।
थापाले कांग्रेसको तर्फबाट प्रभावित क्षेत्रमा गरिएको स्थलगत निरीक्षणका आधारमा विस्तृत प्रतिवेदन तयार गरी सार्वजनिक गर्ने जानकारी पनि दिएका छन्।
उनका अनुसार स्थलगत रूपमा देखिएका समस्या, सरकारले तत्काल र आगामी चरणमा गर्नुपर्ने काम तथा कांग्रेसले आफ्नो तर्फबाट गर्न सक्ने पहललाई समेटेर प्रतिवेदन तयार गरिनेछ।
यसैबीच, थापाले बाढी प्रभावित क्षेत्रमा स्थानीय तह र प्रदेश सरकारबाट भइरहेको खोज, उद्धार तथा राहतसम्बन्धी कामको प्रशंसा गरेका छन्। विपत्तिको अवस्थामा स्थानीय तह र प्रदेश सरकारको सक्रियतालाई सकारात्मक रूपमा लिनुपर्ने उनको भनाइ छ।
Key Quote
‘सहयोग गर्न सक्ने सहयोगमा जुटौं, सहयोग गर्न सक्दैनौं भने पनि कम्तीमा कटु वचन कसैले नबोलौं।’ — गगन थापा
