काठमाडौं । फिफा निलम्बनका कारण नेपालले यही अगस्ट अन्तिम सातादेखि सुरु हुने एएफसी यु–२० एसियन कप छनोट टियर २ अर्थात् ‘डेभलेपमेन्ट फेज’मा प्रतिस्पर्धा गर्न नपाउने भएको छ ।
एसियाली फुटबल महासंघ (एएफसी)को नयाँ अपडेट अनुसार नेपालसँगै टियर १ बाट फिलिपिन्सको नाम हटाइएको छ ।
फिलिपिन्सको हकमा ‘आसियान हुन्डाई कप’सँगको व्यस्त तालिका र तयारीका लागि पर्याप्त समय नभएका कारण टोलीले आफ्नो नाम फिर्ता लिएको हो ।
नेपालको हकमा फुटबलको प्रशासनिक संकट गहिरिँदै जाँदा यसको प्रत्यक्ष असर अन्तर्राष्ट्रिय सहभागितामा परेको हो । एएफसीले गत जुन २७ मा अखिल नेपाल फुटबल संघ (एन्फा)लाई पत्र पठाउँदै यु–२० छनोटमा सहभागिता जनाउने हो भने अगस्ट १ भित्र फिफा निलम्बन फुकुवा हुनुपर्ने चेतावनी दिएको थियो । तर, यसो नहुँदा नेपाली युवा टोलीले अन्तर्राष्ट्रिय एक्सपोजर गुमाउनुपरेको हो ।
फिफा निलम्बनकै कारण तीन साताअघि मात्र नेपाल एएफसी यु–१७ महिला एसियन कप छनोट प्रतियोगिताबाट बाहिरिएको थियो । त्यसको दुई साताअघि एएफसी महिला च्याम्पियन्स लिग २०२६/२७ बाट नेपालको प्रतिनिधि क्लब एपिएफ एफसीको नाम हटाइएको थियो ।
घरेलु महिला लिग स्थगित भएकाले नेपालले प्रतिनिधि क्लब नै पठाउन नसकेको अनुमानबीच एन्फाले साबिक विजेता एपिएफलाई प्रतिनिधिका रुपमा मनोयन गरी दर्ता गराएको जनाउँदै निलम्बनकै कारण प्रतियोगितबाट बाहिरिनुपरेको दाबी गरेको थियो ।
महिला यु-१७ छनोटमा नेपालको सहभागिता सुनिश्चित गर्न १३ जुलाईको डेडलाइन तोकिएको थियो ।
अर्को संस्करण पनि फाइनल प्रतियोगिता खेल्न नपाउने
छनोट प्रतियोगिताबाट नाम हटेसँगै नेपाल अन्तर्राष्ट्रिय एक्सपोजरबाट बञ्चित हुने मात्र होइन, टोलीले अर्को संस्करणको फाइनल प्रतियोगितामा समेत सहभागिता जनाउन पाउने छैन । किन ?
यसपाली एएफसी यु–२० एसियन कपका पछिल्ला तीन संस्करणमा गरेको प्रदर्शनका आधारमा शीर्ष ३२ टोलीलाई ८ समूहमा विभाजन गरिएको छ ।
सिंगल राउन्ड रोविन प्रतिस्पर्धापछि शीर्ष दुई टोलीले चीनको टिकट काट्ने प्रावधान छ । त्यस्तै पुछारको टोली ‘डेभलेपमेन्ट’ फेजमा घटुवा हुनेछन् । यो भनेको अर्को सिजन फाइनल प्रतियोगिता खेल्न नपाउनु हो । अर्को संस्करण पनि चीनले नै आयोजना गर्ने तय भइसकेको छ ।
नेपालसहित दक्षिण एसियाका माल्दिभ्स, श्रीलंका र भुटानगरि कूल १२ टोली डेभलेपमेन्ट फेजमा छन् । यी १२ टोलीलाई तीन समूहमा विभाजन गरिएो छ । समूहका शीर्ष दुई टोली अर्को संस्करणका लागि ‘क्वालिफिकेसन फेज’मा जानेछन् ।
क्वालिफिकेसन फेजमा बढुवा हुनु भनेको अर्को संस्करणमा छनोट हुन आफ्नो दाबेदारी दिन पाउनु हो । अहिले भने यी १२ टोलीले एसियन कप खेल्न पाउने छैनन् ।
नेपालको समूहमा मंगोलिया, ग्वाम र नर्दन मारियाना आइल्यान्ड थिए । फिफा निलम्नबका कारण नेपालले मंगोलियामा हुने खेलहरु गुमाउनेछ । यसको मतलब छनोट प्रतियोगिताको अर्को संस्करण पनि नेपाल डेभलपमेन्ट फेजमै रहनेछ ।
