भोजपुर — नेपाली कांग्रेस भोजपुर नगरपालिका नगर कार्यसमितिको अधिवेशन सभापतिको उम्मेदवारका विषयमा सहमति जुट्न नसकेपछि रोकिएको छ।
बुधबार भोजपुर नगरपालिकाको हलमा आयोजित नगर अधिवेशनमा नगर सभापतिको उम्मेदवारबारे विवाद भएपछि अधिवेशन अघि बढ्न नसकेको हो।
भोजपुर नगरपालिकाका मेयरसमेत रहेका कांग्रेस नेता कैलाश आलेले नगर सभापतिका लागि अशोक राईसहित तीन जनाको नाम अघि सारेका थिए। तर भोजपुर नगरपालिका–३ र ४ का वडा कार्यसमितिले असहमति जनाउँदै अधिवेशन बहिष्कार गरेपछि कार्यक्रम रोकिएको हो।
कांग्रेसका एक सहभागी कार्यकर्ताका अनुसार आलेले आफू निकटका वडा नम्बर १२ का अशोक राईलाई नगर सभापति बनाउन खोजेपछि वडा नम्बर ३ र ४ का कार्यसमितिले असहमति जनाएका थिए।
वडा नम्बर ४ बाट प्रेम भण्डारी नगर सभापतिको उम्मेदवारका रूपमा अघि बढेका थिए। आलेले आफू निकट उम्मेदवारलाई अघि बढाउन दबाब दिएको भन्दै वडा नम्बर ३ का सभापति डिल्ली थापा र वडा नम्बर ४ का सभापति कुमार राउतसहितका प्रतिनिधिले अधिवेशन बहिष्कार गरेको बताइएको छ।
अधिवेशनमा सहभागी एक नेताले आलेले अधिवेशनस्थलमा बहिष्कार गरे पनि केही नहुने भन्दै आफूहरूमाथि दबाब दिएको आरोप लगाए। त्यसको विरोधस्वरूप दुवै वडाका प्रतिनिधिले अधिवेशन बहिष्कार गरेको उनको भनाइ छ।
अन्य १० वटा वडा कार्यसमिति भने अधिवेशन अघि बढाउन तयार भए पनि दुई वडाले बहिष्कार गरेपछि कार्यक्रम रोकिएको हो।
बिहीबार सहमति जुट्न सकेमा मात्र नगर अधिवेशनलाई पुनः अघि बढाउने तयारी रहेको कांग्रेसका स्थानीय नेताहरूले बताएका छन्।
