काठमाडौं । त्रिशूली नदीमा आएको ठूलो बाढीले गोरखा र धादिङ जोड्ने चरौँदीस्थित झोलुङ्गे पुल बगाएको छ।
आइतबार बिहान त्रिशूली नदीमा आएको भीषण बाढीले गोरखाको गण्डकी गाउँपालिका र धादिङको बेनीघाट रोराङ गाउँपालिका जोड्ने चरौँदी झोलुङ्गे पुल चुँडालेर बगाएको हो।
जिल्ला प्रहरी कार्यालय धादिङका अनुसार बिहान आएको बाढीले पुलमा क्षति पुर्याउँदै अन्ततः झोलुङ्गे पुल बगाएको हो।
यसैगरी, बाढीले त्रिशूली नदीमाथि बनेको धवादीस्थित अर्को झोलुङ्गे पुलमा समेत क्षति पुर्याएको छ।
त्रिशूली नदीमा बाढीको बहाव अत्यधिक बढेका कारण धवादीको झोलुङ्गे पुलसमेत बगाउने अवस्थामा पुगेको गण्डकी गाउँपालिकाकी उपाध्यक्ष ललिता अधिकारीले जानकारी दिएकी छन्।
बाढीका कारण पुलमा क्षति पुगेपछि स्थानीय बासिन्दाको आवतजावतमा समस्या उत्पन्न भएको छ। नदीको बहाव अझै बढ्न सक्ने सम्भावनालाई मध्यनजर गर्दै स्थानीय प्रशासन तथा सुरक्षा निकायले जोखिम क्षेत्रमा सतर्कता अपनाउन आग्रह गरेका छन्।
